.png)
13. Kumonosu-jo (1957): Text û Bextê Mirinê
Bavê
xalê xwe tu çima serok û rêberê xwe dikujî? Heger tu bikujî, rojekê tu dê jî bê
kuştin. Lê mirin jêneger e, yek dikuje, yek dimire.
Kurosawa
vî fîlmî ji Macbetha Shakespeare adapteyî Japonyayeke sedsala 15an
kiriye. Min Macbeth nexwendiye, xwezî min bixwenda. Heqê min zêde tune ye nexwe
li ser vî fîlmî biaxivim, herhal.
Ezbenî
guh bide jina xwe lê bi ya xwe bike. Qîma xwe bi ya ber destê xwe bîne. Meriv
nizane, paşê yên li ber destê meriv jî dibin neyarên me.
Washizu
temsîla wan mirovan dike ku di esasê xwe de mirovekî dilpak e lê bi gotinên
jina xwe dixape û dibe neyarên hezkiriyên xwe. Te çû Tsuzukiyê serokê xwe kuşt
Washizu, haydê me ew fam kir, te çi ji Mikiyê dostê xwe xwest hey malneket. Te
dît bê kurê wî çawa pûş xist eyarê te?
Kurosawa
di nav daristanan de pir xweş kamerayê diherikîne, malava weke ku li deştekê
bibeze, kameraya wî bi lez û di şûna xwe de, di nav dar û deviyan re dide
çargaviyan. Bi carekê re, min xwe li wan daristanan hîs kir.
Mirî
vedigerin. Henekên xwe bi me dikin. Xwedî kehanet in derheqê heyata me de. Ne
textê wan heye ne jî bextê wan. Tên me bikujin.
Sehneyeke
komîk heye di dawiyê de, ne komîk e lê ez keniyam. Washizu gava cardî diçe ji
ruhên li daristanê paşeroja serokatiya xwe bipirse, ew ruh jê re dibêjin, gava
darên vê daristanê bimeşin qesra te, bizane ku dawiya te hatiye. Camêrê me
leşkerên xwe bi van gotinan sor dike û henekê xwe bi van gotinan dike. Lê piştî
çend deqeyan hêwirzeyek radibe, em dibînin ku wa ye daristan dimeşe ber bi
qesra wî ve. Ev meşa daran jî dike ku leşker baweriya xwe pê neyînin û bi
hezaran tîran lê bidin. Camêr qulqulî dibe heta tîrek di qirika wî re diçe.
(Jina wî berê gotibû serokê me jî bi kuştinê hat ser text, tu jî dê bi kuştina
wî werî ser text, loma wî ew kuşt.) Çawa ku serokê wî ji aliyê leşkerê xwe
Washizu ve hat kuştin, ew jî bi heman awayî ji aliyê leşkerên xwe ve hat
kuştin. Leşkerên wî jî dê ji aliyê leşkerên xwe ve bên kuştin. Ev çerxa dinyayê
ye, her kes berendamî vê çerxê ye. Lê ka bisekinin, heneka esas ev e: Meşa
daran taktîkeke hêza dijmin e, her leşkerek rahiştiye darekê û pê re dimeşin.
Dawî ji xwe diyar e, text û bextê mirinê qewîntir dibe.
***
Fîlmê bê: Kakushi Toride no San-Akunin - Akira Kurosawa
0 yorum: