.png)
SALIHÊ KEVIRBIRÎ: DIXWAZIM SERDANA HEMÛ WELAT Û PARZEMÎNAN BIKIM
 |
| Salihê Kevirbirî |
1. Kêliyeke te ya bextewar heye ku ji me re
behs bikî?
Dema tiştek,
nivîsarek, xebatek li ber destê min hebe û ez diqedînim. Hingê şûr simbêlê min
nabire û kêfa gurê pîr dikim! Li aliyeke din gelek nasên min hene ku têkiliya
min bi wan re di çarçoveya medenî û însanî de ye. Lê hinek kes hene -gelekî kêm
in- gava di çavê wan de kêfxweşî û bextewarî û dilsoziyê dibînim, ez bixwe jî
bextewar dibim...
2. Tehemula te ji çi re tune ye?
Tehemûla
min ji durûtiyê re tuneye. Ji zilm û zorê re tuneye. Ji şelafiyê re tuneye...
3. Te li vê dinyayê herî pir dixwest kê nas
bikî?
Ne tenê
kesek e. Iznê bide ez navê şeş kesan bidim: Mele Mustefa Barzanî, Evdalê
Zeynikê, Seydayê Cegerxwîn, Jeanne d'Arc,
Yûrî Gagarîn û ji saxan jî min dixwest îro Mihemed Emîn Bozarslan nas bikim…
4. Beriya mirina xwe herî pir dixwazî çi pêk
bînî?
Dixwazim
serdana hemû welat û parzemînan bikim. Xasma divê Rojhilatê Dûr, Amerîkaya
Latîn û herdu cemserên bakur û başûr bibînim...
5. Derî karê xwe, ji çi karî hez dikî?
Ji masîgirtinê
pir hez dikim. Di vî warî de kêmşareza me, lê temaşekirina vî karî bixwe jî kêf
û şahî ye ji bo min...
6. Tu dinyayeke çawa texeyul dikî?
Dinyayeke
ku tê de warekî me yê azad hebe. Dinyayeke ku zilm û zorî lê tunebe, aştî û
azadî lê hebe. Herkes wekhev be...
7. Heke ciwantir bûyayî, te hez dikir çi bikî?
Şikir
jixwe ciwan im! Lê hinekî din ciwantir bûma min dixwest li Kûbayê xwendina
zankoyê bikira. Niha jî dixwazim...
8. Çi kenê te tîne?
Şerê
zarokên 3-4 salî. Videoyên Bavê Çîço –divê herkes bibîne, li ser tora
ragihandinê heye- û tevgerên Ferhad Pîrbal dikin ku ez ji kena zikopişto
bibim...
9. Heyfa te li çi tê?
Heyfa
min tê li wê heyfê ku li ser rûyê dinyayê rola me kurdan bi qasî welatên wekî
Andorra, Srî Lanka, Ûganda û Bosna Hersek û Montonegroyê jî tuneye. Çimkî ew
dewlet in...
10. Heke cardî bihatayî dinyayê, te yê çi tiştî
cardî bikira?
Naxwazim
careke din bême dinyayê. Ev dinya gelekî diwestîne. Lewma ne te pirsî, ne min
bihîst...
11. Tiştên ji te re bûne xûy çi ne?
Tekûzî.
Bawer im nexweşiya sîmetriyê li min peyda bûye. Cihê şûşeya xwe ya çayê jî li
gorî rûniştina xwe deh caran diguherînim. Ne tenê cil û bergên xwe, goreyên xwe
jî didim hev û qat dikim...
12. Tişta ku hêzê dide heyata te çi ye?
Dê-bav,
hemû neferên malbatê. Xwedê hezkiriyên herkesî li wan bibexşîne. Dinya biçûk e,
temen kurt e, hezkirin û hurmet pêwîst e...
13. Dîmeneke çawa te dilteng dike?
Li ber
zilmê dilteng dibim. Divê kesek zilma kesî qebûl neke. Her wiha di welatekî de
divê parsek tunebin. Dema parsekan dibînim dilê min teng dibe. Lê ji hev jî
derdixim kî hewce ye, kî na.
14. Te mekanek bi çi awayî û li kû divê ku heta
mirina xwe tê de bijîyî?
Li
cihekî ku bes dengê çîveçîva çivîkan û xuşîna av û çeman lê hebe...
15. Dixwazî çi li ser kêla gora te bê
nivîsandin?
Pirseke
nexweş e! Lê herçi jî bê nivîsandin, bila bi zimanê kurdî be...
16. Tu dikarî resimekî derbarê xwe de çê bikî?
***
Salihê Kevirbirî
Salihê
Kevirbirî, sala 1975-ê li Batmanê hatiye dinyayê. Xwendina xwe li navçe û
bajarên Batman, Farqin, Misirc, Edene û Stenbolê kiriye. Li Anadolu
Universitesiyê (Zankoya Anadoluyê) ketiye Fakulteya
Ekonomî û
Fakulteya Zanistên Siyasî lê xwendina xwe nebiriye serî. Ev 20 sal in ku li
Stenbolê dijî. Sala 1992-yê dest bi rojnamegeriya kurdî kiriye û di gelek kovar
û rojnameyên kurdî de serkarî kiriye û salen dûvedirêj nivîsiye û hê jî
berdewam dike. Ji ber karê rojnamegeriya kurdî ketiye hepsê. Heta niha 10
kitêbên wî bi zimanê kurdî û tirkî hatine çapkirin û ev kiteb li çend zimanan
hatine wergerandin. Her wiha di 3 salên dawî de
li ser kurdên Sovyetê 20 fîlmên documenter bi zimanê kurdî amade kirine. Salihê Kevirbirî , di nav
Navenda PEN-a Kurd de Berpirsê Nivîskarên Diyasporayê ye û Endamê Enstîtuya
Kurdî ya Stenbolê ye.
0 yorum: